PYD Bible Quiz-ah Bungkawn an thiam ber

Mizoram UPC kohhran ṭhalai pawl, Pentecostal Youth Department buatsaiha neih General PYD Bible Quiz chu a hmawr bawkna neih a ni ta a, Zirtawpni zana final inelnaah Bungkawn PYD chu a dingchang zawkah an ṭang.

GPYD Bible Quiz final hi Ignite Studio-ah neih niin, I & II Timothea, Jakoba leh Kohhran GK hmangin final bik hi inel a ni a, a tawpah point 250 awm aṭanga point 220 hmutu Bungkawn PYD aiawh Lalhmachhuana leh Zothanpuii an dingchang a, point 135 neitu Bilkhawthlir Bial PYD aiawha tel Judy Zorintluangi leh H. Lalrinfeli te'n an phak ta lo.

Final hi zawhna leh chhanna, a kar awl dah khah, tu sawi leh tu hnena sawi nge, rapid fire, bung leh chang, kohhran GK leh optional round hmangtein inelna neih a ni a, zawhna pathum chiah chhang thei lo Bungkawn PYD hian hnehna an chang ta a ni.

Bible Quiz inelna khar zanah hian Catherine Lallawmpuii chu host niin, Sailopari Sailo chu Quiz Master a ni. Rev. Thangliansanga, General Superintendent, Mizoram UPC chuan hunserh hmangin Lalhmudiki leh Vanlaltlansaa te an zai bawk.

Mizoram UPC Studio, Zonuamah Bible Quiz inelna hi June 6 khan neih ṭan niin, tualchhung leh bial aiawhin PYD team 24 an inel a, June 23 zan khan a hmawr bawk a ni ta a ni - inelnaah hian Deuteronomy, Matthaia, Luka, I & II Korinth, Ephesi, Kolossa, I & II Thessalonika, I & II Timothea leh Jakoba bakah Kohhran GK hmangin inelna kalpui a ni.