Asia Pacific Sunrider’s Got Talent-ah Lalsangkima a tel dawn

Lalsangkima s/o Lalhlimpuia Ralte, Khatla Bethel veng chu Asia Pacific Sunrider’s Got Talent 2023 neih turah India aiawha tel tura thlan a ni.

July 13 leh 14 hian Taiwan-ah intihsiakna hi neih a ni dawna, ram hrang hrang 11 aṭangin an tel ang.

He intihsiaknaa India ram aiawh thlang tur hian ram pumpui huapa intihsiakna neih a ni a. Mi ṭhahnem tak zing aṭangin a ṭha zual pathum thlan chhuah an ni a, chumi hnuah India aiawh turin a thiam leh tha an tih ber Lalsangkima chu YOYO tricks hmanga India ram aiawh tura thlan chhuah a ni.

Lalsangkima (Ambush) hi Mizoram chhunga buatsaih U Got Talent, Inhouse Star Challenge leh Mizoram Got Talent-ah te lo tel ve tawhin, Inhouse Star Challenge-ah hian top 5 zingah a tel a, a dangah hian final stage a thleng pha ve ve bawk.