Vawiinah Dance Sports & Movement Championship ṭan dawn

Mizo Dance Camp leh Mizoram State Sports Council buatsaih, Mizoram Dance Sports & Movement Championship chu vawiin hian Dawrpui Multipurpose Hall-ah ṭan a ni dawn ta. He event main sponsor hi Mizoram Rural Bank a ni.

He event hnuaia intihsiakna ṭhenkhat chu online hmanga ṭan a lo ni tawh a, a main event hi ni li chhung awh tur niin, June 30 zan hian Grand Finale neih a ni ang. Vawiin bikah Jump Rope leh Aerobic prelims neih a ni ang.

Aerobics: Aerobics hnuaiah hian Group leh Solo-a intihsiak tur a ni a, group a tel tur hriat tawh zingah HBC Cheerleaders leh GAC Cheerleaders te an tel. A hmuna la in ziah luh theih a ni a, fitness aerobics, gymnastic aerobics leh acrobatic movements te a leng vek.

Aerobics en dik tur hian Mizo zinga fitness leh aerobics instructor rual, Nutei Pautu (Fit In Dance Studio), Misty Hruaii (Lay Up Fitness Studio) leh Esther Chhakchhuak (Fifi Fitness Studio) te an ṭhu dawn a ni.

Jump Rope: Jump Rope hi freestyle niin mipa leh hmeichhia a hrana intihsiak tur a ni dawn a; Badass brand neitu, Samuel Liansanga chu en diktu a ni ang.

Vawiin hian Final lut turte thlan an ni dawn a, naktuk chawhma dar 11 hian Hei Raw Dance Competition Semi Finals neih niin, Ningani hian Showdown dance battle neih a ni bawk ang. Event hrang hranga Final Round leh MDC Team leh Judge-te showcase chu Zirtawpni zan hian dar 7:00 hian neih a ni ang.