Billboard 200: Kar 14 chhung no.1 ni thei ‘One Thing at a Time’

Billboard 200 album chart-ah kar liam ta khan Morgan Wallen 'One thing at a time' chu a chung berah awm lehin, a zawn loin kar 14 chhung no. 1 dinhmun a hauh ta.

Morgan Wallen hian kar 13 chhung no. 1 ni thei Drake 'Views' (2016) a rawn khum a, 2011-12-a Adele-i'n '21' kar 24 chhung no. 1 a nihpui theih hnuah 'One Thing At a Time' hi a chung bera awm rei thei ber a ni. March 18-a a tihchhuah, he album hian kar liam ta khan US-ah equivalent album unit 1,10,000 a la nei thei.

Wallen hian a hla, 'Last Night' chu Hot 100-ah no. 1 a nihpui leh bawk a, chart-ah kar 21 lang tawhin, kar 12 chhung no. 1 a ni tawh.

Chart tharah hian K-pop band, ATEEZ chuan an thlen san ber ṭum rawn thlengin, The World EP.2: Outlaw chu pahnihna an rawn thlenpui a, equivalent album unit 1,05,500 an nei. He album hi kumina kar khat chhunga copy 1,00,000 hralh thei album 10-na a ni. Heng album 10 zinga pasarihte chu K-pop album vek an ni.

No. 3-ah Gunna 'A Gift & A Curse' a rawn lang thar bawk a, Taylor Swift 'Midnights; chu no. 4-ah a la cham chhunzawm a, SZA ' SOS' chu no. 5 ah a rawn chho bawk.

Billboard 200 album chart-a sang zual 10 zingah hian Morgan Wallen ' Dangerous: The Double Album', Metro Boomin 'Spider-Man : Across the Spider-Verse soundtrack' leh Lil Durk 'Almost Healed' an la lang bawk a, Queens of Stone Age chuan 'In Times New Roman' chu a ṭum khatna atan top 10-ah rawn lanpuiin pakuanaah an awm a, Taylor Swift chuan 'Lover' hmangin top 10 hi a khar.