Lersia Play Top Chart : June thla chhungin 'Pa Hausa' a chungnung

Mizo film industry-in hma a sawn a, film hmuhnawm tak tak en tur kan nei chho zel a, a lawmawm hle.

Mizo film-te hi a en duhte tana awlsam zawkna turin Lersia Play aṭangin pek chhuah a ni ṭhin a, man tlawm taka leiin mipuite'n kan lo thlir thei ṭhin a ni. Film siamtute an ṭang a, a changtute an thiam tawh hlawm bawk a, hmuhnawm tak tak thlir tur kan nei a, kan la neih chhoh zel pawh a rinawm.

Lersia Play-in June thla chhunga film a hralh ṭhat ber chu Mizo mipa lemchan thiam em em, Papuia Pachuau channa 'Pa Hausa' a ni. 'Pa Hausa' hi June 9-a tlangzarh a ni a, Director hi Drew Pachuau niin script-writer hi Samuel L Pachuau a ni. In-House Production-in a produce a, co-producer hi Kristie Avon a ni. He film-ah hian Papuia bakah Sangsangi, Joe Pachuau leh Sangpuia-te chu an chang bawk.

June 23-a tlangzarh, 'Mo Kawr' chu June thla chhunga film hralh chhuah hnem ber dawttu a rawn ni pha. Thla tawp lama tihchhuah a ni chungin pahnihnaah a rawn invawrh thei a, entu pawh a la ngah chhoh zel a rinawm. He film-ah hian mipuite duh rawn, Rosangpuii Ralte (Rspi) bakah Isak Chhangte an chang a, Director hi B. Lalbiakvela niin script-writer a ni bawk.

Fiamthu thianghlim hmanga Mizo mipuite tihlimtu, Mastea channa, 'Archangkawm' chu April 24 daih tawha tihchhuah ni mah se, June thlaah pawh entu a la ngah chhunzawm zel a, pathumnaah a la awm thei. Rinkson Entertainment produce, 'Archangkawm'-ah hian mipuite'n kan hmelhriat lar sa, Rinkson squad-te kan hmu a, an part ṭheuh an hnehsawh tlang hle.