Box Office : No. 1-ah 'Indiana Jones And The Dial Of Destiny'

North America box office-ah 'Indiana Jones And The Dial Of Destiny' chu pakhatna a rawn ni a, mahse, opening week-ah hian an beisei erawh a pha lo hle.

Harrison Ford channa, adventure-action film franchise fifth leh final installment hi June 30 khan tlangzarh a ni. Tlangzarh karah North American theater 4,600 aṭangin USD mtd 60 a la lut a, international market aṭangin USD mtd 70 la lut bawkin, khawvel pumah USD mtd 130 a la lut. Mahse, an lo beisei lawk, domestic-ah USD mtd 82 leh khawvel puma USD mtd 152 la lut tura an chhutna erawh a pha ta lo viau.

Sum lak luh lamah beisei pha lo viau mah se, Comscore senior media analyst Paul Dergarabedian chuan kum 40 chuang zet tawh franchise-in box office-a no. 1 a la rawn luah thei chu thil ropui tak a ni, a ti.

Indian Jones film hmasa ber, Raiders of the Lost Ark chu kum 1981 khan tihchhuah a ni. Kum 1984-ah Indian Jones and the Temple of Doom,1989-ah Indiana Jones and the Last Crusade ti chhuak lehin, 2008-ah Indian Jones and the Kingdom of the Crystal Skull chu tihchhuah a lo ni tawh bawk.