Vietnam-ah 'Barbie' movie chhuah khap

Margot Robbie leh Ryan Gosling-te channa, 'Barbie' chu tihchhuah a nih hma aṭangin Vietnam chuan an ramah a khap nghal.

Greta Gerwig siam, fantasy comedy film hi July 21 hian tihchhuah a ni dawn a, mahse, Vietnam sorkar chuan he film-ah hian China-in a ram chhung vek anga South China Sea a tarlanna, nine-dash line tihlan a nih avangin a duh lo a, an ramah tihchhuah a rem ti ve lo a ni. South China Sea hi China leh a ṭhenawm ramte'n neitu nih inchuhin an buai reng a ni.

Vietnam rama film tihchhuah tur hi thuneitu lamin uluk takin an en dik hmasa phawt ṭhin. Tharum thawhna, mipat hmeichhiat lam hawi leh politics lam kaihhhnawh thilte chu en fiah vek hnuah chhuah phalna pek a ni chauh ṭhin. Nikum khan Tom Holland channa, 'Uncharted' chu nine-dash line tihlan a nih vangin chhuah khap a ni a, kum 2018 khan Crazy Rich Asian film-a designer bag-a world map dahah South China Sea island chu China hnuaia awm anga dah a nih avangin a scene hi paih a ni tawh bawk.