Box Office: Tenet bawkin ro a la rel
US Box Office top 5-ah thil danglam lian tham thleng a awm lo a, chart hmasaa an dinhmun ngaiah ding leh deuh vekin Tenet bawkin sum a lalut tam ber leh a ni. Top 10-ah film thar pathum a awm bawk.
Tenet a hlawhtling zel
Christopher Nolan big budget film Tenet chu Box Office-ah pakhatna a ni leh a, film lian dang tlangzarh a awm hma chu pakhatna a ni deuh reng rih dawn a nih hmel.
Kar tawpah khan theatre 2,850 aṭangin $3,400,000 a lalut leh a, US Box Office-ah chuan khum thei an la awm lo a ni. Ram dang aṭanga a sum lakluh nen Tenet hian $maktaduai 284 a lalut tling tawh niin Box Office Mojo chuan a tarlang. US-ah ringawt $mtd 41 chuang a lalut tawh bawk.
The New Mutants bawk pahnihna
The New Mutants chuan theatre 2,305 aṭangin $1,172,088 a lalut a, pahnihna a ni leh a, Unhinged chu palina aṭangin pathumnaah a inhlangkai ve leh thung a, $maktaduai a lalut tling tawh lo thung.
Star Wars: Episode V - The Empire Strikes Back (Re-release) chu palina a ni a, kar hmasaa pathumna Infidel chu pangana a ni ve thung.
Film thar pathum
Box Office Top 10 chart-ah film thar pathum inlan a awm a, Shortcut chu pasarihna a ni a, The Last Shift chu pariatna niin Kajillionaire chu pakuana a ni bawk.
Box Office Mojo chuan chart-ah film 33 a tarlang a, sum hmu tam ho hi theatre 2k chuangah te chhuah an nih tawh laiin movie tam tak chu theatre pahnih khat lek lekah an la chhuah thung.
Chart-ah hian film thar hlak (re-release tel loin) pasarih a awm a ni.