Zaninah 'Vawmva' a en theih dawn ta

Action comedy, 'Lerlawri' channa 'Vawmva' chu zanin hian Lersia Play-ah mipuite en theih tura chhawp chhuah a ni dawn ta.

'Vawmva' hi ram inchuh avanga tualthahna thleng, chumi kal zel avanga phuba lakna a ni. Director hi Chuauthanpuia Pachuau (Chta) a ni a, script-writer hi C. Lalawmpuia (Ete-a) niin, director of photography hi Mapuia Tochhawng, leh production assistant H. Zorampari (Lerlawri)te an ni.

June 29 khan Ngurlianthanga Hall, Kawrthah-ah 'Vawmva' hi premiere a lo ni tawh a, mipui hlut a hlawh hle. Zaninah chuan mahni in lum aṭangin kan thlir thei dawn ta a ni.

He film-ah hian Zoram mipuite'n kan hriat lar leh lawm hlawh, Burma rama drawing zir chhuak 'Lerlawri', a hming tak H.Zorampari chu Police Inspector-ah ṭangin, police senior tawh tak pakhat nen misual an umna lama an inchapchar dante kan hmu dawn a, a hmuhnawm leh viau ang. Hman kuma a huan pal delh chhiatsaktu, Zoliana nen khan an rawn inhmachhawn leh dawn bawk e.

A changtute hi Kawrthah lam mi deuh vek an ni a, a tam zawk chu lemchan lama vawikhat kan hmuhna turte ni mah se, vawi khatna tih hriat loh khawpa talent nei ṭhate an ni.

Film 70% vel hi Kawrthah-ah chan niin, Rengdil, Damcherra (Tripura) leh Assam-ah shoot a ni bawk a, film buatsaihna atan hian thla 10 vel hun an hmang.

Director Chta Pachuau chuan, "Low budget taka siam a ni a, kan hmanraw hmante pawh midang nena khaikhin chuan a inthlau viau, technical lamah pawh sawisel tur pawh a awm thei a, hriatthiamna kan dil lawk a ni. Mahse kan actor-te hi an thiam a, vawikhatna tih hriat loh khawpa ṭhate an ni," tiin Vanglaini a hrilh.

Zanin dar 8 aṭangin Lersia App-ah 'Vawmva' hi a en theih dawn a, Rs 150, Rs 200, Rs 250 leh Rs 300 mante a ni ang.