Meta platform thar Threads-ah darkar 7 chhungin mtd 10 in ziak lut

Meta chuan Twitter el tura a platform siam thar, Threads a siam chu nimin khan a tlangzarh. Tlangzarh a nih aṭanga darkar sarih chhungin mi maktaduai 10 an in sign-up nghal.

Threads hi standalone application ni mah se, Instagram account aṭangin log in a ni. Instagram username chu a hmang ve nghal a, mahse, Threads-ah hian profile chu an customise thei a ni. IG-a an follow ho pawh an duh chuan an follow chhunzawm thei a, IG-a an block pawh automatic-in a block ve nghal bawk. Instagram-a an indah private chu Threads-ah an dah public thei bawk a ni.

IG leh Threads-ah hian post a share tawn theih a, thlalak leh video link pawh dah theih niin, video hi minute 5 chin a dah theih ang.

Threads hi ram 100 chuangah a hman theih a, heng zingah hian India, United States, United Kingdom, Canada leh Japan an tel. European Union ramah erawh a la hman theih dawn rih loh a ni.