BTS hausakna belhchhahin a awm zel

BTS member-te chu zaithiam zinga hausa ber zinga mi an ni tawh a, an label Big Hit Entertainment chuan kumin August thla chhung ringawt a an pawisa lakluh chu $maktaduai 8 a nih thu a puang. 

October thlaa an label a 'public' hunah chuan multi-millionaire an ni tawh dawn. Big Hit Entertainment boss Bang Si-hyuk chuan August thla khan South Korean K-pop band BTS member-te chuan share 68,385 a pe ṭheuh tih tarlangin, chu share hlut zawng hi $maktaduai 8 a ni. 

Bang Si-hyuk hian ma­nage­ment label 43% share a nei a, hei vang hian bil­lion­aire a nih phah dawn bawk. 

Nikuma Big Hit sales 97% lai khan BTS hmuh chhuah a ni a, he an sales hlut zawng hi $mtd 500 a tling pha. Kumin hian 88% a ni thung. 

Covid-19 hri leng vangin BTS hian an tour an cancel a, hei vang hian duh anga tam sales hi an nei hleithei lo a ni. Big Hit chuan an hlut zawng hi $vaibelchhe 4.1 a nih thu a tarlang a, kum 2017 July thla aṭang khan South Korea-a stock offer nei lian ber an ni.    

Bloomberg’s Billionaires Index tarlan dan chuan BTS band hi billionaire an ni tawh a, an net worth chu $vaibelchhe 1.4 a ni.

Khawvel puma BTS huhang ngah zia sawi tam a ngai tawh lo a, tunhnaia Dynamite an tlangzarh hnuah phei chuan an tlana zual hle. Billboard Hot 100 chart-ah Dynamite hi No.1 an nihpui mek a, chumai chu an la duh tawk lo, Billboard Global 200 chart-ah pawh Dynamite bawk hi No.1 an nihpui.