July 15-ah 38th annual Stellar Awards sem dawn

Gospel music lama hun pawimawh tak, 38th annual Stellar Awards semna hun chu July 15 zan hian Las Vegas-a Orleans Arena-ah neih a ni dawn ta. He hun hi Gospel superstar pahnih, Jonathan McReynolds leh Tashha Cobbs Leonard te'n an kaihruai ang.

Steller Awards hi Gospel music lama TV award show hmasa leh upa ber niin, kumin hi kum 38 sem a nihna tur a ni. Award sem zan hi 'Greatest Night in Gospel Music' tihte paw'n an lo sawi ṭhin.

Kumin award sem zanah hian Kirk Franklin, CeCe Winans, Tamela Mann, Pastor Mike, Jr., Kierra Sheard Kelly, Tye Tribebett, Maranda Curtis, The Clark Sisters, Israel Hougton, Doe, Zacardi Cortez,Naomi Raine,Tim Bowman, Jr & Faith City Music bakah artist dang eng emaw zat an perform dawn.

Musical legend Cece Winans chu 'Aretha Franklin Icon Award' hlan a ni dawn a, Dr. Bobby Jone leh Rev. Dr. Milton Biggham-te chu gospel music industry tana an thawh hlawk avangin 'Thomas A. Dorsey Most Notable Achievement Award' leh 'James Cleveland Lifetime Achievement Award' hlan an ni bawk ang. Winans hi hmeichhe gospel artist zingah album hralh ṭha ber leh award dawng hnem ber a ni.