Ram hruaitute'n an rama Eras Tour nei turin Taylor Swift sawm

Taylor Swift 'The Eras Tour' neih mek chu khawvela tour neih tawha hlawhtling ber zinga mi a ni chho mek a, Swift pawh hian a tira an ruahman bakah khawpui leh ram danga tour neihna tur pawh eng emaw zat a belh leh tawh a ni.

Khawvel ram hruaitu ṭhenkhat chuan social media kaltlangin Swift hi an rama tour nei turin an sawm. Chile President Gabriel Borik chuan YouTube-ah Latin America tour neih turah Swift chuan Chile ram chu telh ve se a duh tih a sawi a, an sawmna pawh hi a tihhlawhtlin ngei a beisei thu a sawi.

Budapest mayor Gergely Karacsony pawhin singer hi lehkha thawnin, Hungary ram chu tour neihna tur zingah telh turin a ngen. Mahse Swift hian a ngenna hi a la chhang lo a, Hungary hi tour neihna turah a la telh lo.

Canada Prime Minister Justic Trudeau pawhin a twitter kaltlangin Taylor Swift hi an rama kal turin a sawm a, an lo hmuh thuai a beisei thute a tarlang.

Thailand-a rorellai, Move Forward Party hruiatu Pita Limjaroenrat pawhin twitter aṭangin pop sensation hi an ram mipuite'n an ramah kal ngei tura an duh thu a sawi ve bawk.

Swift hian The Eras Tour a neihna tur hi a belh leh fo a, hei vang hian heng ram hruaitute ngenna pawh hi a la tihlawhtling maithei a ni.

Taylor Swift hian kar liamta,an ram huna Ningani zan khan a album Speak Now (Taylor's Version) chu a tichhuak a, record eng emaw zat a siam chho leh nghal a ni. Kumina album release zingah, release nia Spotify-a stream ngah ber niin, stream mtd 209 a nei hman. Swift hian nikum October-a Midnights album a release khan ni khatah stream mtd 229 neiin, arstist zingah ni khata stream mtd 200 nei thei awm chhun a la ni. Hei bakah iTunes lamah pawh a album hi record a siampui nghal bawk a, khawvel huapin record a la siam chhoh zel a rinawm.