"Ghostbusters: Afterlife" sequel chang zo tawh

"Ghostbusters: Afterlife" sequel chu an chang zo tawh a, mahse, Writers Guild of American (WGA) te nawrh huaihawt avangin tihchhuah hun tur an la chiang lo. Ruahman lawk dan chuan December thlaa tihchhuah an tum a, mahse, an sawi chiang ngam rih lo.

Film series-a Winston Zeddemore-a chang, kum 77 mi Ernie Hudson chuan film chu chan zawh a ni tawh a, editing leh a ṭul dang khawih mek a ni a, kumin kum tawp lamah emaw, nakkum nipui lamah emaw a chhuah a rin thu a sawi.

American supernatural comedy film, Ghostbusters film thar hi a official title sawi lan a la ni lo a, 2021 film Ghostbusters: Afterlife chhunzawm a nih avangin Ghostbusters: Afterlife 2 tiin sawi a ni. Hei hi Ghostbusters franchise-a film pangana tur a ni. A changtu thar zingah hian Silicon Valley actor Kumail Nanjiani, stand-up comedian Patton Oswalt, Gossip Girl star Emily Alyn Lind, leh English comedian James Acaster-te an tel.