Khiangte Construction Ṭhazual Gospel : Hma hruaitu - Maruati 'Amen pe zel ang che'

Khiangte Construction Ṭhazual Gospel chart tharah Maruati chuan 'Amen pe zel ang che' tih hla hmangin hma a hruai.

Mizo gospel top artist zinga mi, Maruati zaithiam zia hi sawi nawn a ngai tawh awm lo e, a zaithiam piah lamah a hla sak apiang a sa nungin a ngaihthlatute rilru hneh takin a sa thei zel a ni. 'Amen pe zel ang che' tih hi Mary Lalfakawmi phuah a ni a, a hla phuahte album-a an siam, 'Hnehna chu Lalpa ta a ni' tiha mi niin May 23 khan tihchhuah a ni. Recording hi H.C. Recording-ah tih a ni a, music hi Tetea Forte kutchhuak a ni. Video hi Milestone Picture siam a ni thung.

Hun eng emaw chen rimawi lama a reh hnua rawn let leh, Nancy Zothanmawii chu 'Ka fak a che' tih hmangin pahnihnaah a rawn lang a, Divine Voice 'Van in nuam' pawhin hma sawn zelin chart tharah pathumnaah an rawn inhlangkai. Top 5-ah hian Faktu leh KṬP, Electric Veng Branch te an lang bawk.

Ṭhazual Gospel Top 10-ah hian Malsawmdawngzuali leh Amtea an la awm chhunzawm zel a, anni bakah mi thar pathum - Arini, Thawhlehnaniropuia bakah Mizo Idol Season 6-a pakhatna, Jerry Elaro-te an rawn lang a ni.