Warner Bros-in 'Barbie' film-a world map sawi fiah

'Barbie' film tihchhuah turahworld map tihlanah, South China Sea chu China ram ta anga tarlan a nih avangin Vietnam in an rama tihchhuah a khap hnuah, Warner Bros chuan map chungchang hi a sawi fiah.

Kar liam ta khan Warner Bros studio chuan film-a world map chu naupang drawing ang mai mai a nih thu leh, engmah tihchhan nei a nih loh thu thuchhiah siamin a sawi. "Barbie-in Barbie Land aṭanga khawvel taka a zinna dan a tarlanna mai a ni. Engmah tihchhan a awm lo. Barbie Land-a map hi chu awmze nei lo, naupang lem ziah ang chauh a ni," a ti.

'Barbie' hi July 21-ah US-ah tlangzarh a ni dawn a, hemi ni vek hian Vietnam-ah pawh tlangzarh tura ruahman a ni. Mahse, Vietnam thuneitute chuan map-a China-in South China Sea a ram anga a chhalna, nine-dash line tihlan a nih avangin an rama tihchhuah a khap ta a ni.

Vietnam hian an ram khawpui, Hanoi-a tour nei tur, K-pop group Blackpind tour organiser website-a map-a South China Sea an dah lan chu an chhui mek bawk.