Zohnahthlak unaute tan Sawmtea Chhangte che chhuak dawn
US-a cham mek, Mizo mipa gospel artist lar leh sawm hlawh tak, Sawmtea Chhangte chuan July 16 zan hian Maryland, USA-ah Gospel Charity Concert a nei dawn.
He Concert hi Mizo Society of America leh Chin Association of USA in Sawmtea puala an buatsaih niin, Chin Baptist Mission Churh ( CBMC )-ah neih a ni ang. Concert-a sum hmuhte hi Manipur leh Myanmar-a Zohnahthlak, harsatna tawkte tan a bo a bang awm loin pek a ni dawn. Sum hmuhte hi CYMA kutah hlanin, anni hian a remchan dan angin an lo pe chhuak ang.
US-a Zohnahthlak zaithiam lar - Joseph Suanlian, Rebecca Fanai, Sabina Fanai, Sui Par Chin te chuan Sawmtea hi an pui dawn a, Live music nen Concert hi neih tur a ni.
Sawmtea chuan, "Hetiang hun kan hmang thei tur hi ka lawm tak zet. Mizoramah Charity-in vawi tam tak ka pen chhuak tawh a, USA-ah pawh mahni tan ngawta kal ni loin, midangte ka ṭanpui theihna awmchhun nia ka hriat leh ka duh em em kan tihlawhtling thei tur hi ka lawm tak zet a ni. Kan unaute'n ṭanpui an ngai a, khawi hmun aṭang pawhin kan tih theih ang tawk tih zel hi ka duh ber a ni. Kan thawhchhuah tam leh kan unaute'n ei tur leh sin tur an neih tam dawn avangin theihtawpin ka ṭang a ni," tiin Pathian hnena ṭawngṭaipui turin Mizo mipuite a ngen.