‘Squid Game 2’ producer-te'n ngaihdam dil

Netflix 'Squid Game 2' chu chan mek a ni a, Incheon International Airport-a shooting an neihnaa midangte tana harsatna thlen nia sawiselna a awm avangin film producer-te'n ngaihdam an dil.

July 11 kan mi pakhat chuan online-ah “Squid Game 2” staff member nen an indawr dan leh, a lungawi loh thu hi a ziak lang. Incheon International Airport-ah shooting an neih lai hian staff member-te chuan mipuite chu public escalator hman an phalsak lo a, an ṭawngkam hman danah a lungawi thlak loh thu a sawi. Elevator hmang tura kal mipuite chu ṭha taka hrilh mai loin, 'Go back' tiin thu an pe ringawt zel a ni, a ti.

He post an hmuh hnu hian “Squid Game 2” producer-te chuan ngaihdam dilna hi an siam ve nghal a, "July 10-a Incheon International Airport-a shoot kan neih chungchangah a hmuna mipui awmte chu kan theih angin kan hrilhfiah a, hetih lai midangte tana harsatna kan lo siam chu pawi kan tiin ngaihdam kan dil a ni," an ti. Film an chan chhunzawm leh zelna turah pawh an fimkhur zual tur thu an tarlang bawk.