Emmy Awards nomination puan a ni ta

Television Academy awards, 75th Emmy Award nomination chu nimin zing khan puan a ni ta a, HBO leh HBO Max chu nomination hmu tam ber niin, Disney+ in a dawt.

2023 Emmy Awards hi September 18 hian Los Angeles-a Peacock Theatre-ah sem tum a ni a, mahse, Hollywood writer-te'n nawrh an la huaihawt chhunzawm zel chuan sawn hlat a ni maithei. Host tur pawh hi puan a la ni lo.

HBO family drama, 'Succession' chuan nomination 27 hmuin a hmu hnem ber a, 'best drama' dawng thei tura chhawp chhuah zingah pawh a tel. HBO series dang, 'The Last of Us' chuan nominationa 24 leh 'The White Lotus' chuan nomination 23 hmuin, Apple TV+ 'Ted Lasso' chuan nomination 21 a hmu bawk.

Comedy caterogy-ah Abbott Elementary, Barry, The Bear, Jury Duty, The Marvelous Mrs. Masiel, Only Murders in the Building, Ted Lasso leh Wednesday an lang.

Drama series-ah Andor, Better Call Saul, The Crown, The House of the Dragon, The Last of Us, Succession, The White Lotus leh Yellowjackets-te chu award dawng thei tura chhawp chhuah an ni bawk.

Nomination-a lang zingah actor 38-te chu an lan ṭum khatna a ni a, an zingah hian George & Tammy-a changtu, Oscar winner Jessica Chastain, Black Bird-a changtu Taron Egerton, Wednesday changtu Jenna Ortega leh Jurty Duty-a chang James Marsden-te an awm.

Nomination-ah hian music kaihhnawih show pawh eng emaw zat an lang. The Apple Music Super Bowl LVII Halftime Show Starring Rihanna (Fox) chu outstanding variety special (live)-a nominate zingah a tel a, NBC The Voice chu a ṭum 12-na atan outstanding reality/competition program-ah nominate a ni leh bawk. Music/dance programe-a nominate ngun ber record a siam nghal. Dancing With The Stars (11 nods), American Idol (9 nods) leh So You Think You Can Dance (5 nod)-te a khum.