Hollywood actor-te'n nawrh an huaihawt

Hollywood actor-te intel khawmna, Screen Actors Guild (SAG) chuan studio lam nena inremna an siam theih tak loh avangin, Ningani zanlai aṭang khan nawrh an huaihawt. Kar 11 zet nawrh lo huaihawt tawh, screen writer-te an zawm a, kum 1960 hnua pawl pahnihte'n a ruala nawrh an huaihawt lehna hmasa ber a ni.

May 2 aṭang khan Writers Guild of America (WGA) chuan hlawh ṭha zawk leh, hnathawh dan kalphung ṭha zawk phutin nawrh an lo huaihawt tawh a ni. WGA-ah hian member 11,5000 vel an awm. Union dang, Directors Guild of America (DGA) erawh chuan June thla khan an inbiak rem theih avangin nawrh hi an zawm ve lo.

SAG, official-a Screen Actors Guild-American Federation of Television and Radio Artists (SAG-AFTRA) tia sawiah hian performer 1,60,000 zet an awm a, A-list star eng emaw zat an tel. SAG hian actor-te chu base pay ṭha zawk pek an phut bakah, actor-te aia artificial intelligence (AI) leh computer-generated faces and voices hman an duh lo a ni.

SAG hian Los Angeles time-a Ningani zanlai aṭang khan nawrh hi ṭanin, nimin khan California-ah Netflix, Parmamount, Warner Bros leh Disney headquarters-ahte lungawi lohna an lantir chhunzawm. Nawrh huaihawt vang hian London-a Oppenheimer premier-na hmun chu a changtute - Cillian Murphy, Matt Demon leh Emily Blunt-te chuan an chhuah san nghal.

Actor-te nawrh vang hian US film leh TV production tam ber chu Ningani zan zanlai aṭang khan an chawl a ni.

Hetih lai hian studio lam pawl, Alliance of Motion Picture and Television Producers ( AMPTP) chuan actor-te thutlukna siam dan chu ṭha an tih loh thu an sawi a, an beisei loh thil a ni tih an sawi. AMPTP-ah hian Walt Disny Co. leh Netflix Inc. pawh an tel. SAG-te thutlukna siam chuan eizawnna atana film industry-a innghat, mi sing tel a nghawng a, sum leh pai lam thlengin harsatna an thlen dawn a ni, an ti. Disney CEO Bob Iger chuan actor leh writer-te thil phut chu a taka tihhlawhtlin theih loh, hripui lengin na taka a nghawng film industry dinhmun tihchhiat lehzualna a ni, tiin a sawi.

Film leh TV show a nghawng dawn

Actor-te nawrh huaihawt vang hian US-a film leh scripted television show buatsaih chu chawlh vek a ngai dawn a, SAG-in labor contract a a siamin a huam tel loh, indepdenent production chauh kalpui chhunzawm a ni ang.

Theatre lama film tihchhuah mek erawh a nghawng rih dawn lo a, mahse, film tihchhuah thar turte chu inremna an siam theih hma chuan sawn hlat an ngai dawn. Heng zingah hian Marvel 'Blade' leh 'Thunbderbolts' te pawh an tel, film chhuak tur tihlarna hun, promotional event buatsaih ṭhin pawh an ṭhulh a ngai bawk dawn a ni. Event dang, Emmy Awards leh Comic-Con-te pawh sawn hlat an nih hmel bawk.

International event, Toronto leh Venice film festival-te chu buatsaih a ni dawn tho a, mahse, SAG actor-te erawh inlan lo ang.

Streaming service lam

Nawrh huaihawt chhung hian streaming service Netflix, Amazon.com Inc Prime Video leh a dangte chuan local-language show, (Korea, India) te chu an pe chhuak chhunzawm thei dawn a, mahse, Hollywood production lam chu tihtawp rih a ni ang.