Hollywood actor nawrh huaihawtin a awh rei mai thei

Hollywood actor intel-khawmna, Screen Actors Guild (SAG) te'n Alliance of Motion Picture and Television Producers (AMPTP) nena inremna an siam theih tak loh avanga nawrh an huaihawt chuan kumin chhung a daih maithei nia sawi a ni.

SAG nawrh huaihawt hi movie leh television lama star lian tak takte'n an zawm a, kar liam ta Ningani zanlai aṭang khan performer 1,60,000 vel chuan hna an chawlhsan a ni. Zirtawpni khan union member-te chu Los Angeles, New York leh khawpui dangah studio leh streaming service office pawnah pung khawmin, lungawi lohna an lantir bawk.

May 2 aṭang khan member 11,500 vel awmna, Writers Guild of America (WGA) chuan AMPTP laka lungawi lohna lantirin nawrh an lo huaihawt tawh bawk.

SAG leh WGA hian studio leh streaming service-te chu hlawh ṭha zawk pek, royalty tihsan, pension leh health plan ṭha zawk siam leh, industry-a actor-te thlakna atana artificial intelligence, AI hman ṭhin titawp turin an phut a ni. Ṭum eng emaw zat AMPTP lam nen hian inbiakna nei mah se, tun thlengin inremna an la siam thei lo.

Kar liam ta khan nawrh huaihawt chungchangah hian White House chuan thuchhuah siamin, president Joe Biden chuan hnathawktu zawng zawng, actor-te pawh huamin, an hnathawh phu ang hlawh leh hamṭhatna dangte pek vek an ni tur a ni tiin, nawrh huaihawt chu a thlawp thu leh, an inbiak rem theih thuai a beisei thu a sawi a ni, a ti.

Hollywood actor-te'n nawrh an huaihawt hnuhnung ber chu kum 1980-ah khan niin, kar 10 chhung a awh a ni. Hetih lai hian actor leh writer-te'n a ruala nawrh an huaihawt hnuhnung ber chu kum 1960-ah a ni thung.