Khiangte Construction Ṭhazual Lengzem: The Radio-in hma sawnin a chung berah an awm ta

Khiangte Construction Ṭhazual Lengzem chart tharah,The Radio chuan an original 'I kiangah chauh' chu hma rawn sawnpuiin, a chung ber dinhmun an rawn luah ta.

Tun laiah band anga lansarh leh invawrh chhuah a har chhoh viau karah, The Radio hian ngaihven an hlawh chho hle a, an la lar chhoh zel pawh a rinawm. 'I kiangah chauh' hi chart hmasa lama pahnihnaa a awmin hma lam a pan zel a, chart tharah no. 1-ah a rawn invawrh chhuak ta a ni. He hla hi May 21-ah an tihchhuah kha niin, recording hi 3 Brothers Recoding Studio-ah tiin, video hi Osiama Pictures kutchhuak a ni.

Hun eng emaw chen rimawi lama a thawm a reh hnua rawn inlar thar, Nancy Zothanmawii chu a la zaithiam reng a, 'Hmana kan nunhlui' tih chu pahnihnaah a rawn lanpui. Tunlaia lengzem artist lama thawm nei lian ber pawl, Zaii Hauchhum pawhin a kar hnihnaah a hla thar, 'Bawihtuai' chu pathumnaah a rawn lanpui thei ta nghal bawk. T Francis Kawlni leh Mary Dawngi-te pawhin hma lam rawn pan zelin, 'Rinawmin' leh 'Chhingkhualah' chuan top 4 leh 5 an rawn luah.

Mi pali rawn lang thar

Bawiha Renthlei pawhin 'Engtik niah emaw chuan' chu chart-ah a la champui zel a, no. 6-ah a awm. Hetih lai hian chart-a lang thar mi pali an rawn awm thung. David Darlong 'Min tiam rawh', Jenny Jathang 'Vengtu Angel' , B. Lalpianmawia 'Min lo chhang bawih' leh TC Tetea 'Kan hlim ni te' chu chart-ah an rawn lang thar bawk.