Box Office: Roreltu thar Mission: Impossible - Dead Reckoning Part 1

Tom Cruise channa, action film franchise seventh installment, 'Mission: Impossible - Dead Reckoning Part 1' chu North American Box office-ah kar liam ta chhunga sum la lut tam ber a ni.

USD mtd 300 zet senga siam, 'Mission: Impossible - Dead Reckoning Part 1' hian tlangzarh kara a sum lak luh tura beisei chu pha lo mah se, no. 1 dinhmun erawh a hauh ta tho a ni. USD mtd 60 emaw, a ai tam emaw la lut tura beisei a nih laiin, tlangzarh karah hian USD mtd 56.2 a la lut.

Kum 27 zet awh tawh, he series zingah kum 2018-a tihchhuah, "Mission: Impossible - Fallout" khan tlangzarh karah USD mtd 61 la lutin, 2000 khan 'Mission : Impossible II' chuan a kar khatnaah USD mtd 57.8 a la lut a, he series zinga tlangzarh kara sum la lut tam an la ni chhunzawm ta zel rih.

No. 2-ah political thriller 'Sound of Freedom'

Faith-based political thriller, Sound of Freedom chu no, 2-ah rawn awmin, ram chhungah USD mtd 27 hmuh belh lehin, a sum lak luh hi USD 83 a tling tawh. Hetih lai hian a hma kar lama a chung bera awm, 'Insidious : The Red Door' chu no. 3-ah nek thlak a ni a, USD mtd 13 a lak luh belh ve leh bawk.

'Indiana Jones and the Dial of Destiny' pawh no. 4-ah a tla thla a, kar liam ta khan USD mtd 12 lak luh belhin, a sum lak luh hi USD mtd 125.3 a tling tawh. Pixar romantic comedy 'Elemental' chu kar nga hnuah pawh Top 5-ah a la inhamtang thei a, USD mtd 8.7 hmuh belh lehin, khawvel huapa a sum lak luh hi USD mtd 300 a tling tawh.