Jungkook-a recipe ru-a puh vangin GS25 in an thil siam titawp

South Korea-a covenience store chain lar tak, GS25 chuan an ei tur siam chhuah thar ber chu BTS Jungkook-a idea ru-ah a fan-te'n an puh avangin an titawp.

GS25 hian an menu item thar ber an pho chhuah hi perilla oil buckwheat noodles a ni a, mahse, an rawn tlangzarh hnuah Jungkook-a fan-te chuan Jungkook-a'n a hmaa a thil siam a lo share tawh nen a in ang tiin an sawisel a ni. Hei bakah he noodle package rawngah hian BTS color atana an hman, 'purple' an hman tel leh zel avangin an sawi zui nasa hle.

Jungkook hian April thlaa fan community live broadcast a neih ṭum khan, a ei tur siam “Spicy Bulmayo Perilla Oil Makguksu” a tih chu a rawn tilang a, a hnuah community page-ah a recipe a rawn dah lang bawk. Hei vang hian GS25 in an ei tur siam thar an rawn pho chhuah hian, fan-te chuan Jungkook-a ei tur lo siam tawh nena an in an dante an hre nghal chat a, an idol idea ru-ah an puh zui. Hei vang hian company pawhin an thil siam thar hi titawpin an ennawn leh dawn tih an sawi a, nidangah an fimkhur tawh tur thu an sawi bawk.