Mizo film thar TAWKI a chhuak hnai

FADYO Picture's Production chuan 'Tawki' movie chu mipuite en theih turin an chhawpchhuak thuai dawn a, July 28 zanah Lersia Play kaltlanga en theih tura dah tum a ni.

Action-tragedy-thriller "Tawki"-ah hian pafaa zin, pa ber boral thut vanga unaua vakvai, a nau ṭawng thei lo nena harsatna tam tak paltlangtu, Tawki phuba lakna kan hmu dawn a ni. "Zuali te Unau" tih film-a a changtunu Florence Vanlalhriatzuali chu he film thara leading role la tur a ni a, a acting skill a ṭha a, action role nena pui taka a che vel hi a hmuhnawm ngei ang.

'Tawki' film hi Mizo film-a sulhnu nei lian ber pawl leh a hun laia Mizo film hit ber berte lo siam tawh ṭhintu, C.Hmingthangvunga siam a ni. Hminga chuan he film hi belhchian dawl tak a nih a rin thu leh, visual effect leh after effect-ah a satliah dawn loh thu a sawi.

He film theme song/OST chu Mizo Idol lama kan lo hmelhriat tawh, Angela Malsawmpari'n a rawn sa a, a music video hi zanin aṭangin Youtube-ah en theih a ni ang.