AC/DC line-up tharah Johnson, Williams leh Rudd an lo kir

Kar tir lamah khan an social media account-a an thil post hmangin an fan-te an chawk phur hle a, eng thil nge la hre lo mah se ruahmanna lian tham eng emaw an neih ring an tam a, rock magazine lam chaw tui ber pawh a ni. Tunah chuan chu chu eng nge a ni tih a hriat ta.

Australian rock band 'Alternating current/Direct current' chuan an band line-up thar an tlangzarh a, kumin atana an official band photo hmasa ber an pholang bawk. An band line-up tharah hian mi thar an awm lo a, AC/DC fan-te duh tur ang takin an band an indin ṭha leh a ni ber.

Hard rock legend AC/DC hian an band line-up an thlak fo a, lut chhuak an awm ve deuh reng tih an band history chhiar tawhte chuan an hre awm e. Tunah erawh band original member nia chhal ngam he khawvela la awmte chu an indin ṭha leh tawh a, vocalist pawh Axl Rose a ni tawh dawn lo a, 'Back in Black' hitmaker Brian Johnson ngei mai zai kan ngaithla leh dawn. An fan-te tan chuan hei ringawt pawh hi phurawm tak tur a ni.

Angus Young leh Mal­colm Young-te'n kum 1973-a din AC/DC hian an member duhlai an chan nual tawh a, kum 1980 khan an vocalist duhlai Bon Scott thih vangin an lo kehdarh ṭep tawh a, mahse Scott thlak zo taktu Brian Johnson an chhar fuh hlauh a, khawvela album hralh kal ber zinga mi 'Back in Black' a lo pian phah a nih kha. Kum 2017 khan an band khaipa ber zinga mi Malcolm Young chu a thi tawh bawk a, heng fam tate pahnih hi koh kir rual ni tawh lo mah se tuna an line-up thar tur erawh hi chuan fan-te a tiphur hle thung.

Brian Johnson leh Angus Young combination fuh lutuk hmuh tur a awm leh tawh dawn a, Malcolm Young aiawh turin kum 1988 vela an band lo pui tawh ṭhintu, Malcolm boral hnua a patea aiawh zo tak Stevie Young chuan a pate Angus-a guitar zut vel a thlawp chhunzawm dawn a; AC/DC-a lut chhuak zing ve tak, an drummer chuam Phil Rudd chuan tlar hnunglam aṭangin khuang a vaw dawn bawk. Kum 2016 khan band a chhuahsan thu sawi tawh mah se kumina line-up tharah hian Cliff Williams chuan bass guitar a chang leh dawn a, kum 1977-2016 inkara AC/DC tana lo perh thum tawh kha a ni a, AC/DC combination ṭha tak kha hmuh tur a awm leh dawn tih a chiang.

Angus Young high school kalna ṭhin kawtah ni thum liam ta khan PWRUP tih inziahna poster hmuh tur a awm nawlh mai a, eng nge a awmzia hriat chak an tam hle. An official poster-ah pawh a background-ah chu thu chu hmuh tur a awm a, an social media account lamah pawh chu bawk chu an tarlang bawk.

Hemi avang hian PWR UP (or PWR/UP) chu AC/DC album thar title a nih ring an tam hle. AC/DC lam hian hemi chungchang hi chiang takin an la tarlang lo thung a, mahse awmzia eng emaw tak chu a neih a rinawm hle a ni.