Gospel band thar 'Faktu' hla thar nen

Mizo mipa Gospel singer hriat hlawh tak tak pangate chuan band thar 'Faktu' an din a, hla thar an tichhuak ṭep a, an music video thar kan thlirin kan ngaithla thei ṭep tawh a ni.

'Faktu' band member-te hi tute nge an nih sawi thar vak a ngai tawh lo. 'Fakin zai se' tih hla hmanga Zofate min lo awi tawh ṭhintu RK Vanlalpeksanga, tunhma deuha The Kneeling Band member ṭhin, Rebecca Saimawii nena 'Kan zam lo'ng' tih hla satu JH Lungmuana leh 'Khengbetin' tih hla thiam taka satu Lalremsanga (Betea) tihte an ni nawk. Chumai a la ni lo, Ṭhazual chart topper-te pawh lo ni tawh Holy Fire Team soloist Sangzuala Chhangte leh Mizo Idol star B Lalbiakkima (Bka)-te pawh an tel a, an zai a ngaihnawm lo thei lo.

An hla thar tihchhuah tur chu 'Ṭahna reng a awm tawh lo' a ni a, Sangkhumi Pachuau hla phuah niin a thluk erawh Faktu band member-te siam ho a ni thung. RDS shots chuan uluk takin video a buaipui sak mek a, Faktu zai kan ngaithla thei ṭep tawh a ni