Avatar 2 an chang zo tawh
Khawvela film hlawhtling ber zinga mi Avatar director James Cameron chuan Avatar 2 chu an chang zo tawh tih sawiin Avatar 3 pawh an chang zo ṭep tawh tih a sawi.
2020 Austrian World Summit tana kar hmasaa Arnold Schwarzenegger nena video conferencing kaltlanga an inbiaknaah Cameron chuan Avatar chu 100% an zo tawh tih leh Avatar 3 chu 95% an zo tawh tih sawi a ni.
Avatar chhunzawmna hi hripui leng vanga hun eng emaw chen an chan chhunzawm theih loh hnuah June aṭang khan New Zealand-ah an chan chhunzawm leh a, tunah chuan part 2 chu an zo fel der tawh.
July thla tawp lamah khan Avatar sequel film pali tlangzarh hun tur chu tihkhawtlai a ni tih tarlan a lo ni tawh a, Avatar 2 hi kum 2022 December 16-ah daih tlangzarh an tum a, Avatar 3 chu December 20, 2024-ah tlangzarh tumin Avatar 4 chu December 18, 2026-ah an ruahman thung a, Avatar 5 phei chu December 22, 2028-ah daih tlangzarh an tum a ni.