Netflix-in India-ah password sharing titawp

Streaming service lian, Netflix chuan nimin aṭang khan an account hmangtute tana password inhman ṭawm theiha an siam, password sharing chu India ramah a titawp. Account pakhat aṭangin mi pakhat chauhin a en thei tawh dawn a ni.

May thla khan Netflix hian password sharing hi ram 100 chuangah a lo titawp tawh a, heng zingah hian US, Britain, France, Germany, Australia, Singapore, Mexico leh Brazil-te pawh an tel. Password sharing an tihtawp hnu hian khawvel pumah company hian subscriber maktaduai 6 dawn an neih leh phah. Ram dangah pawh he policy hi tihtawp zel an tum.

Kumin kum chanve chin report an tihchhuahah, Netflix hian subscriber mtd 238 nei mekin, an sum hmuh hi USD tld 1.5 a tling.

Netflix chuan India rama an user-te chu email thawnin, an account chu anmahni leh in khata an chenpuite chauhin an hman theih tur thu an hriattir. An chhungkaw pawn lam mi zingah a hmaa a password hmanpui an awm a nih chuan, account siam thar a, an password thlak turin a hriattir a ni.

Password sharing tihtawp a nih tak avangin, Netflix account nei chuan an account hmanpuitute an en fiah a ngai dawn a, account-a security and privacy settings aṭangin 'Manage access and devices' option-ah an lut ang a, hemi hnu hian 'should not have access' tihte chu sign out in, password thlak tur a ni ang.