Bollywood star-te'n Manipur hmeichhe 2 chunga thil thleng an dem

Manipur-a tualchhung buaina chhuah hnua Kuki hmeichhe pahnih, saruaka kawng zawhtir an ni chu ram chhung leh ram pawnah sawiselna a nasa hle a, Bollywood star-te pawhin Manipur-a thil thleng demna thu an au chhuahpui nasa hle.

Kiara Advani chuan Manipur-a hmeichhiate chungah rawng taka chetna thleng chu a rapthlakin a tha a tikhur tih a sawi a, hmeichhiate hian rorelna dik tak an hmuh thuai a, he thila mawhphurtute chu hremna na ber pek a phut thu a twitter-ah a tarlang.

Actor Akshay Kumar pawhin hetiang thil rapthlak hi a thlen nawn tawh lohna turin, misualte chu hremna na tak pek ngei an nih a beisei thu a sawi.

Messiah of Migrants' tia sawi, Sonu Sood chuan Manipur-a thil thleng video chuan mi zawng zawng rilru a tina a ni, a ti.

Comedian Vir Das chuan political leader leh official-te a demna thu tarlangin, he pawikhawihna thlen lai video twitter lama an dah hma khan hma la tur an ni tiin, hruaitute chuan mihring tak chu an ngaihsak lo a, online-a mipuite thinrimna chauh chu an ngaihven zawk a ni, a ti.

Priyanka Chopra pawhin tribal hmeichhe pahnihte chunga pawikhawihna rapthlak tak a thlen aṭanga ni 77 hnuah a video hi a viral a, video a viral hmaa pawikhawihtute chunga action lak a nih loh chhan a zawt let bawk.

The Kashmir Film director, Vivek Agnihotri chuan rawng taka chetna tuartute chu pawisawi lo, an nute leh farnute an ni ṭhin tiin, "India mi, mipa, mihring ka nihnaah, hetiang thil thleng hian min tikehsawm a, ka zak ngawih ngawih a ni," a ti. Anni bakah Urmila Matonkar, Sanjay Dutt, Ekta Kapoor, Jaya Bachchan, Richa Chaddha, Renuka Shahane, Riteish Deshmukh leh star dang emaw zatin Manipur-a thil thleng an demna hi an sawi chhuak a ni.