Khawvel mihring 60% chuangin social media khawih

Internet service a ṭha chho zel a, hei vang hian khawvel pumah social media hmangtu pawh an pung zel.

Digial advisory firm, Kepios-in zirchianna a neih aṭanga report a tihchhuah thar berah, kumin July thla thlengin khawvel mihring tlukdingawn nga chuangten social media an khawih a, hei hi khawvel puma mihring awm zat aṭanga 60% chuang an tling.

Report chuan kum hmasa aiin social media khawihtu (active user) hi 3.7% in an pung tih a tarlang a, hei hi mi vbc 17.3 tlingin, kum khat chhunga social media khawih thar hi second tinah mi 5.5 zel awm ang an an ni. Khawvel pumah social khawihtu zat hi tld 5.19 awm tawhin, hei hi mihring awm zat aṭang 64.5% a tling a ni.

Hetih lai hian ram bial, region-ah social media khawih zat hi an danglam hle thung. East leh central Africa-ah chuan mi 11 zinga pakhat zelin social media hi khawih ang a ni a; khawvela mihring tamna ber ram, India-ah chuan mi pathum zinga pakhat zelin social media a hmang thung.

Social media lama hun hman ral zat pawh a pung chho hle, chawhrualin ni khatah darkar 2 leh minute 26 ang a ni. Brazilian-te chuan hun hmang tam berin, social media khawih nan ni khatah darkar 3 leh minute 49 an hman laiin, Japanese-te chuan darkar khat an hmang tling lo thung.

Social media hmangtute hman tam ber hi platform pasarih a ni a, heng zingah hian Meta hnuaia mi, WhatsApp, Instagram leh Facebook-te chu hman nasa ber zingah an tel. China apps pathum - WeChat, TikTok leh local version Douyin bakah, Twitter, Messenger leh Telegram-te chu social media platform lar zingah an tel bawk. Hetih lai hian fake account/duplicate account a tam hle a, heng zawng zawngte chhiar tel chuan account awmzat hi khawvel mihring awm zat aiin a tam thei dawn niin report chuan a tarlang bawk.