Malaysia ram dan sawisel vangin Music Festival titawp

Malaysia khawpui, Kuala Lumpur-a music festival, Good Vibes Festival-a Zirtawpni zana headline, 1975 frontman, Matty Healy-a'n Malaysia-in mahni anpui kawp khapna dan a siam a sawisel a, a runluihna atan stage-a mawi lo taka a chet avangin festival hi tihtawp a ni.

Event organiser, Future Sounds Asia chuan Inrinni khan thuchhuah siamin, festival hi ni thum hman chhunzawm tur la ni mah se, British band frontman-in an ram dan a sawisel avang leh, an ram danin a khap anga a awm luih avangin Ministry of Communications and Digital thupek angin festival hi tihtawp a ni tih a sawi.

Malaysia ramah hian mahni anpui kawp hi khap tlat niin, dan bawhchhiate chu kum 20 thleng lung-in tantir theih a ni.

FSA chuan show neih hma aṭangin band management team chuan Healy leh band chuan tualchhung inkaihhruai dan an zawm dawn tih an tiam lawk a, mahse an intiamna hi engahmah an ngai zui lo tih sawiin, Healy-a'n an ram dan zahpah lo taka a sawi leh, khapna siamte runluiha stage-a a bandmate mipa a fawp chu an dem tih an sawi. A chetdan mawi lo tak chuan music festival hlimawm leh hriatreng tlak hman tum fan tam tak a tilunghnur hle tih an sawi bawk. Hetiang thil a thlen hnua festival kal chhunzawm tir chu nghawng ṭha lo zawk a neih a hlauhthawnawm avangin, organiser lamin sum tam tak hloh phah dawn mah se an cancel tih an sawi. Ticket lei tawhte pawh an refund leh vek dawn tih an sawi.

FSA founder leh director Ben Law chuan kum 10 chuang Good Vibes Festival hi Malaysia rama rimawi kutpui hlimawm tak hmanna turin an lo buatsaih tawh a, kum 10 chuang hlim taka kan lo hman ṭhin chu mimal pakhat chetdan avangin hetiang dinhmun hi an tawng ta tih a sawi. He festival hi local leh international artist-te inphochhuahna atana tih niin, organiser-te pawh an ram dan leh dunte zawm turin an ngen lawk vek ṭhin.