Khiangte Construction Ṭhazual Gospel: Top 10-a hla 2 nei thei Nancy Zothanmawii

Khiangte Construction Ṭhazual Gospel chart tharah rimawi khawvel lama hun eng emaw chen a thawm a reh hnua rawn comeback, Nancy Zothanmawii chuan a hla, 'Kan fak a che' tih chu a chung berah a rawn lanpui ta.

Nancy hian 'Kan fak a che' tih hi May 23 khan tichhuakin, he hla hi P.L. Engmawia phuah a ni a, music hi Uncle John kutchhuak niin, MaskyRecords-ah recording hi tih a ni. A video hi Chiangtea Videography siam a ni thung. A aw nalh tak te, a zaithiam dante a la ngai reng a, a hla a sa nungin ngaihthlak a nuam em em. Top 10-ah a hla pahnih langin, 'Aman engkimah min hria' chu no. 9-ah a lanpui bawk.

Pahnihnaah chart-a lo lang fo tawh, Faktu 'Pathian hmangaihna' tih chu a rawn lang a, member-te hi gospel artist ṭha ber zinga mi lo ni tawh vek an ni a, an zaithiam zia sawi nawn a ngai awm lo e. Malsawmdawngzuali 'Siamtu duan reng a lo ni' pawhin hma sawnin pathumnaah a awm a, Top 5-ah Amtea 'Ka la hlim leh dawn' leh, Arini 'Isu ka hmangaih che' te an rawn lang bawk.

Ṭhazual Gospel top 10-ah hian Mizo Idol aṭanga rawn invawrh chhuak, Thawhlehnaniropuia leh Jerry Elaro-te bakah, Tluangtluangi leh Zorinsanga Sailo te an awm bawk a ni.