'Rocky Aur Rani Kii Prem Kahani' film tlangzarh hmain a senso 90% dawn hmu chhuak der tawh

Bollywood film chhuak thar tur zinga nghahhlelhawm ber pawl, Alia Bhatt leh Ranveer Singh-te channa, 'Rocky Aur Rani Kii Prem Kahani' chu tihchhuah a nih hma hauhin film siamna atana senso 90% dawn sum a hmu chhuak der tawh.

Film budget hi Rs. vbc. 160 a ni a, hei bakah print & publicity-ah Rs. vbc. 18 sen ni bawkin, a vaia sum sen hi Rs. vbc. 178 a tling. Mahse Zirtawpnia tlangzarh tur chauh ni mah se, flim siamtute hian Saregama aṭangin music rights-ah Rs.vbc. 30, Colors aṭangin satellite rights-ah Rs. vbc. 50 leh, Amazon Prime Video aṭangin digital rights-ah Rs. vbc. 80, a vaiin Rs. vbc. 160 an la lut der tawh a ni.

'Rocky Aur Rani Kii Prem Kahani' hi Karan Johar direct a ni a, kum 2016-a 'Ae Dil Hai Mushkil' a siam hnuah director anga a rawn kir lehna hmasa ber a ni. Nimin aṭang khan advance booking pawh hawn ṭan a ni bawk. He film-ah hian veteran actor - Dharmendra, Jaya Bachchan leh Shabana Azmi-te pawh an lang.