Slash-a'n G N' R film siam a duh lo

Rock band-te chanchin film-ah siam a ni fo a, hetih lai hian artist ṭhenkhat erawh chuan big screen lamah an chanchin pho chhuah an tum lem lo. Guns N' Roses guitarist, Slash pawh an band movie siam duh lotu zingah a tel.

G N' R hian official authorized biography an nei lo a, mahse, an chanchin ziahna bu, unauthorised book erawh eng emaw zat a awm thung.

Guitar legend, Slash chuan an band chanchin film-a siam chungchang hi a ngaihtuah loh thu a sawi a, hemi rual hian engtikah mah siam a ni lo ang tih erawh a sawi thei lo tih a sawi. Film siam a duh lohna chhan pakhat chu band-a mite lema chang tur actor thlan chhuah chungchangah te, music scene leh musician-te nitin khawsak dan pho lan te chu phuahchawp belh, 'over' taka pho chhuah a ni ṭhin tih sawiin, a nihna dik tak anga an tarlanna chu a vang hle tih a sawi. Hei vang hian hetiang zinga tel hi a duh lo tih a sawi a ni.

An band chanchin movie-a siam a duh loh viau laiin, Slash hi rock 'n' roll movie, horror film siamnaah a tel nia sawi a ni a, mahse, a inhnamhnawih dan erawh a sawi chiang duh lo.