Box Office : Rin phak bakin Barbie a che na Oppenheimer in beisei a khum

Tlangzarh a nih hma aṭanga thawm nei lian tak, 'Barbie' chu a thawm rin ang bawkin box office lamah a tal na a, tlangzarh karah domestic-ah USD mtd 155 a la lut hem mai. USD mtd 90-110 vel la lut tura rin kha a ni a, an beisei sang viau tawh chung pawhin an rin phak bak a la ni cheu.

Greta Gerwid direct, 'Barbie' hi kumina film debut lian ber a ni a, tlangzarh kara USD mtd 146.3 la lut thei "The Super Mario Bros. Movie" a rawn khum. Hei bakah hian hmeichhe direct film zingah debut lian ber record a siam nghal a ni.

'Barbie' nena tlangzarh rual leh thawm ring tak bawk, Christopher Nolan film,'Oppenheimer' pawhin USD mtd 80.5 zet la lutin beisei a khum ve bawk. Movie nghahhlelh pahnih tlangzarh rualte hian kar liam ta khan North American theater-ah record an siam a, “Barbenheimer”hian box office a nghawr nghing a ni e.

Barbie hi North American theatre 4,343-ah tihchhuah niin, Oppenheimer hi US leh Canada-a theatre 3,610-ah tihchhuah a ni bawk. Oppenheimer hi Nolan-a non-Batman debut lian ber leh, R-rated biographical drama-a bul ṭan ṭha ber pawl a ni.

Film thawm ring pahnih entu lam pawh an inṭhen phawk. Barbie entu zinga 65% chu hmeichhia niin, PG-13 rated movie entu zinga 40% chu kum 25 hnuai lam an ni. Hetih lai hian Oppenheimer entu 62% chu mipa an ni a, entu zingah kum 25 chunglam 63% an awm a, kum 18-25 inkar 32% an awm bawk.

Rotten Tomotoes lamah pawh Barbie leh Oppenheimer hian critics-te fak an hlawh a, 90% leh 94% an score a, audience lamin film pahnih hi A CinemaScore an pe bawk.