Billboard 200: Speak Now (Taylor's Version) No 1-ah awm chhunzawm

Billboard 200 album chart-ah Taylor Swirft re-recorded album pathumna, 'Speak Now' (Tyler's Version) chu a kar hnihna atan no. 1 a ni chhunzawm.

Speak Now (Taylor’s Version) hi Swift-i re-recorded album zinga no. 1-a kar hnih chhung awm thei hmasa ber a ni. A hmaa a lo tihchhuah tawh, Fearless leh Red te kha no. 1 dinhmun rawn luah pha mah se, a kar hnihnaah an tla thla nghal a ni. Swift album tihchhuah thar leh hian kar liam ta khan US-ah equivalent album unit 1,21,100 a nei.

Album chart Top 10-ah hian Swift album pali an lang a, Speak Now (Taylor’s Version) bakah Midnights (No. 4), Lover (No. 6) leh Folklore (No. 10) te an lang a ni.

Hun rei tak no. 1 dinhmun lo hauh tawhtu, Morgan Wallen pawh a tla hniam hlei thei lo a, "One Thing at a Time" chu no. 2-ah a la awm chhunzawm leh. Equivalent album unit 1,05,000 nei lehin, tihchhuah a nih aṭanga kar 20 chhung chu kar tin equivalent album unit 1,00,000 chuang a la nei ziah a, kum 2014 December thlaa album ranking title siam a nih hnuah kar tina unit 1,00,000 chuang nei rei thei ber album a ni. Morgan Wallen album dang, "Dangerous: The Double Album" chu no. 5-ah a rawn chho bawk.