Irish singer Sinéad O'Connor a thi

Irish singer, a hla 'Nothing Compares 2 U' hmanga kum 1990-a khawvel hriata rawn invawrh chhuak, Sinead O'Connor chu Nilaini khan kum 56 mi niin a thi.

Sinéad O'Connor chhungte chuan a thih thu hi puangin, a thih chhan tak erawh an sawi lang lo.

Grammy winning singer hian kum 1987-2014 inkarah khan studio album 10 a tichhuak a ni. Khawvel huapa a larpui, 'Nothing Compares 2 U' hi Prince phuah a ni a, 1991 khan Grammy Awards-ah nomination pali a hmu a ni.

Kum 2021 khan music lam a chawlhsan thu a puang a, mahse, ni rei vak lo hnuah a thutlukna a sut leh. Kum 2022 January-ah a fapa, kum 17 mi Shane a intihlum a, O'Connor hian a tuar na hle a, rilru lam harsatnate a neih phah a, damdawi inahte enkawl a ni. Tun hnaiah erawh a Facebook-ah hma lam beiseina sang tak a neih thu leh, music thar a buaipui mek thu leh international tour a neih theih a beisei thute a tarlang a ni.