Vanglaini Bihchianna: Entrepreneur Huang - TiLi

Mizoram sorkara Labour, Employment, Skill Development & Entrepre-neurship (LESDE) Department leh Tharthilthlentu - Entrepreneurship & MSME Support (TiLi) chuan July 14,2023 khan Mizorama Entrepreneurship leh Startup tihhmasawn leh tihchangtlunna turin thawh dunna tur thuthlung an ziak.

Mizorama Entrepreneurship leh Startup tihhmasawnna tura hma la tu, TiLi chu Vanglaini-in a bihchiang a -

TiLi din hun leh a thil tum

TiLi hi non-profit organization (NPO/ NGO) a ni a, Mizoram Societies Registration Act, 2005 hnuaiah, ‘Tharthilthlentu - Entrepreneurship & MSME Support’ tihin registered a ni a, office hi TiLi Center, Mission Veng, Aizawl-ah a awm. Kum 2020 kum tawp lama din Tharthilthlentu (TiLi) hi entrepreneur-te tana pawl niin, official registration chu 2021 February-ah a nei.

TiLi tum ber chu mahni kutkea din leh intodelh inzirtir a, entrepreneur leh startup-te tih hmasawn leh tihchak a, Mizorama startup ecosystem ṭha leh nghet tak siam kawnga theihtawp chhuah a ni. Mizote'n sorkar hna deuh chauh hi hna ṭha leh hna puitlinga kan ngaihna tihbo bakah, Mizote hi Mizoram chhung chauh ni loin, India ram leh khawvel huap thleng pawhin kan ding chhuak ve thei a ni tih inzirtir leh tihhlawhtlin a ni.

Hma an lak tawh dan

TiLi Incubator: Incubator hi startup-te hmasawnna leh hlawhtlinna atana inpuihna hmun a ni. TiLi Incubator hi Mizorama private-a enkawl official incubator hmasa ber a ni a, tunah hian startup 10 chuang a nei tawh. Technology, management leh innovation lama thil tihhlawhtlin tum nghette a ngai pawimawh ber. TiLi Incubator hi startup india official incubator niin, Startup India Seed Fund Scheme (SISFS) sem thei dinhmunah ding mekin, North East Region-a pali thlan zingah a tel.

Chengrang leh Ngenmu (Ch&Ng): Ch&Ng hi Mizorama investment reality show hmasa ber niin kum 2021 aṭanga ṭan a ni a, season 3-na a kalpui mek. Season 1 ah khan cheng nuai 60 hu chuang investment neih niin, startup tel zinga 94% an chhunzawm (survival rate) a ni. Season 2 erawh Farmer Producer Company (FPC) tana CEO hunt nana hman a ni thung.

Seoson 3 hi kuminah neih leh mek niin, Accelerator model leh investment reality show chawhpawlha kalpui a ni. Episode 1 hi Sandbox vuahin, participant zawng zawng riak lutin intuaitharna hun hman pui an ni a, Zonet-ah July 28 aṭang khan chhuah ṭan a ni. Episode 2 hi Pitching round niin, startup tinte'n an idea jury hmaah an pitch a, a ṭha zual pali hnenah Rs. 2L ṭheuh seed fund pek an ni a, Zonet-ah August 22-ah chhuah a ni leh ang. Startup 4 bik seed fund hman dan leh TiLi Incubator-in a puih dan Episode 3, September-ah en theihin a awm leh dawn a, final Episode 4 chu Investment Show ang neih niin October-ah Startup program pui tham tak live show anga neih a ni ang.

Thawhhonaa (Partnership): TiLi hi India ram hmarchhak bial chhunga skill development leh entrepreneurship tihhmasawn nana Nabard Nab-Foundation project pakhat Project NEW (North East Entrepreneurship World) atan state NGO partner a ni. KIIT Technology Business Incubator (KIIT-TBI) nen Mizorama entrepreneurship leh startup tihhmasawn nan thawhhona ziak fel turin kalpui mek a ni. Hrangbana College nen thawhhona thuthlung ziak tawhin institution dang nen inbiakna an nei mek bawk.

Ministry Youth Affairs & Sports (MYAS) nen ṭangkawpin Y20 Brainstorming Session, TiLi Center-ah hlawhtling takin 21.7.23 khan huaihawt a ni a, ‘Future of Work: Industry 4.0 Innovation & 21st Century Skills,’ tih thupui sawiho a ni.

TiLi Entrepreneurial Mindset Curriculum (TEMC): TEMC hi sikul zirlaite tana ruahman a ni a, sikul-ah kar tinin TiLi in class an la ve a, mahse, exam a awm lo. Sikul naupangte mahni kutkea din inzirtir nan seed fund (Rs 2000) naupang team tinte pek an ni a, chu chu course chhungin an tipung a, a pung an nei a, seed capital hi an submit let leh ṭhin. Tunah hian sorkar sikul pahnih, Govt. Hrangchhuana High School leh Govt. Republic High School-ah Vanlalthlana, MLA nen ṭangkawpin course hi kalpui mek a ni.

TiLi TiTi: TiLi TiTi hi awmze nei leh ṭha zawka ṭhalaite tana sawihona hmun atana duan a ni. Chi hrang hrang pathum a awm a, TiLi TiTi, TiLi TiTi - Mizoram Discourse Platform leh TiLi TiTi Podcast te an ni.

Starting Up Bootcamp : Ni 4 chhung entrepreneurship leh startup training program bik a ni. Crash course ang ni in, a telte chu entrepreneur nihna leh startup din kawnga thil ṭul leh ṭha tur zirpui ṭhin a ni.

Training Programs: Entrepre-neurship leh startup training hi Aizawl, Lunglei leh Serchhip-ah nei tawhin, district capital zawng zawngah chuan neih chhoh an tum.

TiLi hian shared office tlawmtea book theihna hmun a siam a, chu chu Coworking Space tih a ni. Tualchhung thil siam coffee leh eitur (snacks) tui taka lei mai theihna, TiLi Cafe a awm bawk. Youtube channel, ‘Tharthilthlentu - TiLi’ tih neiin, program hrang hrang dah chhuah ṭhin a ni. Instagram @tharthilthlentu ah follow theih reng niin, facebook leh platform dangah pawh chak zawka hma lak a tum.Website hi tharthilthlentu.com tih leh tili.co.in a nei bawk.

LESDE nena thawh dun dan tur

TiLi hian LESDE nena an thawhdunnaah entrepreneurship leh startup lam project-te ruahman sakin a chhutzuisak ang a, LESDE nena programme hrang hrangte mumal taka inremna siam a nih theih nan an enkawl bawk ang. TiLi hian Skill Training Scheme awm saah Entrepreneurship Development Training dah tel a tum a, hei hian entrepreneur lama tui mite an thiamna tihpunna kawngah a pui dawn a ni. LESDE nen hian resources awmsa hmanga Mizorama entrepreneurship tihhmasawn leh tihchangtlun tum a ni a, LESDE-in MINECO-a an building tharah TiLi tan hian hnathawhna hmun, office space (coworking space) siamsak an tum bawk.

Hmachhawp neihte :

TiLi Incubator hmanga global level thlen: TiLi Incubator hian state chhung chauh ni lo, state pawn startup ṭhate incubatee lak ve a tum chho dawn. Khawvel pum huapa hmasawnna tur ruahmanna lian tak neih a, startup friendly incubator ṭha ber anga insiam chhoh a tum.

TEMC: TEMC hi naupangte'n an hlut thiamin, hmasawnna ṭha tak tak an neih vangin, tihchangtlun chhoh theih dan ngaihtuah tum a ni

District capital tina Center neih: Aizawlah chauh ni loin district capital tinah Center hawn chhoh an tum.

Online reach tihzau: Ṭhalai leh naupang lam zawkte a ngai pawimawh a, ram tana awmze nei turin an website, youtube channel leh social media account-te hman nasat deuh deuh tum a ni.

Investment Reality Show huap zau zawk: Investment Show hi Ch&Ng tihlen leh, North East level show-te neih theih dan kawng a awm a nih chuan ruahhmanna siam chhoh tum a ni

Magazine leh Booklet ṭha siam: Entrepreneurial magazine leh Jargon booklet siam sa te tihchangtlun tum a ni.

Startup Community chak siam: Startup formalisation a ngaihpawimawh rualin community chak zawk siam a tum a, startup-te hmasawn tlan nan intihsiak tlannate pawh duan tum a ni.

Entrepreneurship leh startup lama tui mi, hma lak duh ve tan TiLi Center Mission Veng, 2nd Floor JL Building, MV119 Mission Veng, Aizawl, Mizoram 796005 len luh theih reng a, phone number 8729986889 ah biak theih leh, chibai.tili@gmail.com / chibai@tili.co.in ah email theih reng an ni. TiLi youtube leh social media a chunga tar chhuahahte khian zir chian a, biak theih reng an ni bawk