'Barbie' movie an siam chhunzawm ngei a rinawm

'Barbie' movie chu a hit rem rem bawk a, barbie doll maker Mattel chairman leh CEO Ynon Kreiz chuan 'Barbie' sequel awm tur lam hawiin a ṭawng chhuak a, TV leh brand dang tam zawk pawh thawhpui an tum chhoh tur thu a sawi.

Kreiz chuan, "Engmah puan chu a la awm lo a, a chhunzawmna siam a ni dawn tih sawi nan pawh la hma deuh. Mahse a hlawhtlin dan han thlirin, thil dang pawh a la rawn hring chho ngei dawn a ni," a ti.

Mattel Films hi Mattel film production division niin, 'Barbie' film producer zingah a tel. July 21-a tlangzarh, Barbie movie hian khawvel pumah USD mtd 400 chuang a la lut der tawh a, a elpui nuclear arms biopic 'Oppenheimer' chuan USD mtd 238 a la lut tawh bawk.

Mattel hian April-June, 2023 chhung khan barbie doll bik an hralh chhuah hi a tla hniam viau a, mahse, hemi chhung vek hian doll division pumpuiah erawh an hralh chhuah hi 10% in a pung thung. Barbie movie rawn hit chho hian barbie doll sales lamah nghawng a rawn neih chho ngei a rinawm a, Barbie-themed mechandise-te pawhin movie a chhuah hnuah barbie doll hralh chhuah rate hi a sang chak hle niin an sawi.

Mattel hian an toys siam behchhan hian film 14 vel an siam tawh a, heng zingah hian Hot Wheel, UNO leh Magic 8 Ball te pawh an tel.