Emmy Awards 2023 sem hun tur sawn

Hollywood actor leh writer-te nawrh huaihawt vangin September thlaa neih tum, Emmy Awards sem hun chu sawn a ni.

Writers Guild of America leh Screen Actors Guild-te chu Alliance of Motion Picture and Television Producers (AMPTP) nena an inrem theih loh avangin an nuar mek a, hei vang hian heng pawl pahnihte hian hna an thawh chhunzawm theih loh bakah publicity lam engmah an ti thei lo a, awards show-ah pawh hian an inlan thei dawn lo.

WGA leh SAG-AFTRA-te hi AMPTP nen hian inremna siampui tura inbiakna neihpui dan kawng an la ngaihtuah mek a ni.

75th Emmy Awards hi September 18-a neih tura ruahman a ni a, mahse actor-te an inlan thei dawn lo a, host pawh a awm dawn loh avangin sawn a ni a, organiser-te chuan neih hun tur pawh a la ruat fel lo a, TV company lam nena inremna siam hun an nghak.

Kum 20 chuang hnuah Emmy sawn hlat a nihna hmasa ber a ni a, kum 2001 khan 9/11 pawikhawihna rapthlak tak avangin sawn a lo ni tawh bawk.

Hollywood nawrh huaihawt vang hian Creative Arts Emmy, September thla tir lama neih tum pawh sawn a ni bawk a ni.

Emmy hi television lama chawimawina ngaihhlut ber a ni a, kumina award sem tur atan hian nomination pawh puan vek tawh a ni. Sucession, The Last of Us, The Whote Lotus leh Ted Lasso-te chu nomination hmu tam zingah an tel.