LBS Kia Showroom hawnnaah Seltos tlangzarh nghal

LBS Kia Showroom, Zemabawk ami chu Inrinni liam ta khan Rev Vanlalbela'n a hawng.

Korean company Kia dealer, LBS Group hian nikum September 28 aṭang khan car hi an hralh c hhuak ṭan a, an hralh chhuah aṭanga thla 10 hnuah dan pangngaiin showroom hi an hawng a ni. July 29 thleng khan car hi 231 an hralh chhuak tawh.

LBS Group hian hlawhtling takin Mizoramah Suzuki two-wheeler dealership an kalpui mek a, car duang mawi thiam Kia dealership an hawn bakah German motor company Force dealership hmu fel tawhin hawn an la hmabak a ni. LBS Kia Managing Director, Lalnunthara Ngurte chuan bike second hand pakhat aṭangin sumdawnna bul an tan tih sawiin, tunah chuan company 10-ah dealer an ni thei tawh a, Pathian hmangaihna vang chauh a nih thu a sawi.

Showroom hawn rual hian Seltos thar tlangzarh nghal a ni bawk. Kia hian SUV hriat hlawh, Seltos tuai tharin July 4 khan India ramah tlangzarh a ni tawh; Mizoramah Kia showroom hawn a nih hnuah khuh hawngin mi pathum hnenah an pe chhuak nghal a, Seltos hlui zawk 87 an hralh chhuak hman bawk.

Seltos thar hi a hranpaa booking hawn a ni lo a, a duh tan lei nghal theih zel a ni. A man tlawm ber Rs 12,06,219 a nih laiin a to ber Rs 21,69,117 a ni.