TBC-a MV thar ‘Khualzin cham mai ka ni’

Mizo mipa gospel artist kan neih ṭhat ber zinga mi leh zai nung thei em em, TBC Zaithanpuia chuan ama hla phuah, 'Khualzin cham mai ka ni' music video a tichhuak a, a Youtube channel-ah en leh ngaihthlak theihin a chhawpchhuak.

He hla hi June 20,2023-a a phuah niin, June 26-ah a thluk hi a siam a ni. A hnathawhna avanga hmun danga a awm hnuah a nupui fanaute ngai taka a awm leh, an bula haw theih hun a nghahlelh em em, anni pawhin nghakhlel taka an lo thlir ṭhinna aṭangin, Pathian kianga awm phei chu thlakhlelh viau tur a lo ni tih hriatchhuahna aṭangin he hla hi a phuah. "Min hmangaihtu tak tak leh ka tana chatuana ro hlu ber Isua pawh hian a hnên ka thlen hun tur hi nghakhlel takin a lo nghak reng hian ka hre tlat a ni. Kan hre chiang lo zawk a, hre chiang phei ila chuan kan tana a buatsaih Jerusalem thar hi, âw thlen hlân kan va nghakhlel zual dâwn em," tiin 'Khualzin cham mai ka ni' tih hi a phuah chhuak a ni.