Khiangte Construction Ṭhazual Lengzem: Zaii Hauchhum a rawn lang e

Khiangte Construction Ṭhazual Lengzem chart tharah, a zaithiam zia leh a performance hmuhnawm ṭhin zia inhrilh nawn ngai lo, Zaii Hauchhum chuan beisei lawk ang ngeiin a hla 'Bawihtuai' tih chu chart chung berah a rawn lanpui ta.

Tunlai Mizo lengzem artist hmeichhe zinga huhang ngah ber pawl, Zaii Hauchhum hian 'Bawihtuai' music video hi July 2 khan a tichhuak a ni. A lyrics leh music hi Rpa Ralte siam niin, guitar hi Ephraim kutchhuak a ni a, video hi Bilywaif Film kutchhuak a ni ve thung. A hla a mawiin a satuin a thiam bawk a, ngaihthlak leh thlir a hlawh chho zel ngei ang.

Zaii hian chart-ah a hla dang, 'Kar hla ṭhin mah se' tih lanpui bawkin, no. 8-ah a awm.

No. 2-ah Mary Dawngi 'Chhingkhualah' awmin, ani pawh hian hma a rawn sawn chho zel. Mizo Idol aṭanga rawn lar chhuak, David Darlong chuan a hla, 'Min tiam rawh' tih chu chart hmasaa no. 7 aṭangin no. 3-ah a rawn kai chhohpui ta bawk. Bawiha Renthlei 'Engtikniah emaw chuan' leh, Jenny Jathang 'Min lo chhang bawih' tih chu Top 5-ah an rawn lang bawk a ni.

Top 10-ah hian B.Lalpianmawia leh TC Tetea bakah, lang thar pahnih an awm bawk. Siamsiami Pachuau leh Various artists 'Zo-fate Lal Ram' chu chart-ah a ṭum khatna atan an rawn lang.