Meta Thread hmangtu 50% chuangin tla hniam leh nghal

Mark Zuckerberg-a company, Meta-in Twitter, X tia thlak tak el tura a siam, Threads chu tlangzarh a nih aṭanga ni nga chhung lekin user mtd 100 chuang an in sign-up a, app. hmangtu ngah chak ber a rawn ni hman. Mahse July 5-a tlangzarh, Thread hmangtu, active user hi thla khat pawh a tlin hmain 50% chuang zetin a tlahniam leh nghal.

Internal town hall meeting-ah Mark Zuckerberg chuan Threads-in a user zahve aia tam a hloh leh nghal thu hi a sawi a, an app chu 'perfect' lo mah se, an beisei aia ṭha a ni tho tih a sawi. A hmangtu tam zawk hian chhunzawm lo mah se, boruak a pangngai tih a sawi. In sign-up zinga a zahve tal chuan hmang chhunzawm zel se chuan thil lawmawm tak a nih tur thu a sawi rualin, "User tla hniam leh vak ṭhin hi thil nihphung ve a ni. App-ah feature tam zawk kan dah belh zel avangin hmang chhunzawmtu pawh hi an la rawn pun chhoh leh ngei kan beisei," tiin a sawi.

Online traffic service, SimilarWeb-in a tarlan danin, tlangzarh a nih kar aṭanga chhutin nitina Threads hmang ṭhin hi mi mtd 49 aṭangin mtd 23.6-ah an tla thla tawh a ni. Thread audience hi Twitter audience 22% vel chauh a la ni pha niin a report bawk.

Tlangzarh a nih hnuah Meta hian Threads feature-ah hian 'following' leh 'for you' feeds a belh a, post-te chu ṭawng chi hranga lehna tur pawh a siam belh leh tawh bawk a ni.