BLACKPINK-in album an tlangzarh ‘Lovesick Girls’ M/V tichhuak nghal

Blackpink chuan an Korean studio album hmasa ber 'The Album' chu nimin khan  YG Entertainment leh Interscope katlangin an tlangzarh a, hemi rual hian music video thar 'Lovesick Girls' a tlangzarh nghal bawk.

'Lovesick Girls' bakah hian 'The Album'-a mi hi single-in 'How You Like That' leh Selena Gomez an zaipuina Ice Cream'-te chu an lo tlangzarh tawh bawk a, a hit dun hle.

K-pop super group-te hian an album thara hlate hi Covid-19 vanga inkhung hran hunlaia an phuahte leh an record-te a ni hlawm a, producer hrang hrang- Teddy, Tommy Brown, R. Tee, Mr. Franks leh 24-te an thawhpui a ni. 

'The Album'-ah hian track pariat a awm a, chung hlate chu streaming platform hrang hrangah ngaihthlak theihin an dah chhuak tawh. 

Rosé, Lisa, Jennie leh Jisoo-te chuan album an tlangzarh hma lawka ET-in an kawmnaah Rose chuan album an tlangzarh tur chu phurawm an tih thu leh hripui leng kara album buaipui chu thil hautak a nih thute an sawi a, Lisa pawhin an fan-te chuan an hlate chu 'enjoy' se a duh thu a sawi ve bawk.

Selena Gomez an thawh­puina 'Ice Cream' chu album an tlangzarh hmain single-in kan hmu tawh a, an album tharah hian Cardi B an zaipuina 'Bet You Wanna' chu an dah tel bawk. He hlaah hian  Cardi B-in rap-in a pui a, hei hi an album tihlu zualtu pawh a ni ngei ang.

Blackpink hian khaw­thlang lam zaithiam hrang hrang an thawhpui tawh a, chung zingah chuan Dua Lipa leh Lady Gaga-te pawh an tel a, an thawpuite hian thawhpui nuam an tih thu an sawi hlawm nghe nghe.

Nimina album thar an tlangzarh rual khan Blackpink chuan music video thar 'Lovesick Girls' an tichhuak tel a, a hit nghal lehpek hle a; darkar 4 chhungin mi maktaduai 21 chuangin an thlir hman tawh a ni.

Album an tlangzarh piah lama 'Lovesick Girls' an tichhuak hi Blink lam chuan an lawm hle ang tih a hriat theih a, music video hmuhnawm tak kara an lam hmuhnawm tak en tur a awm leh bawk nen, streaming platform hrang hrangah stream a hlawh leh hle dawn tih a chiang.

1.    How You Like That

2.    Ice Cream (with Selena Gomez)

3.    Pretty Savage 

4.    Bet You Wanna (featuring Cardi B)

5.    Lovesick Girls

6.    Crazy Over You

7.    Love to Hate Me

8.    You Never Know