Avora Records album thar 'Comedians on Drugs'
Hornbill International Rock Contest 2017 winner Avora Records chuan Ningani khan an album hmasa ber 'Comedians on Drugs' chu an tlangzarh.
Kum 2019 September thla khan Avora Records vocalist Stephen Hnamte chuan album an buaipui thu leh hla 10 a awm dawn tih Vanglaini a lo hrilh tawh a, kum khat chuang a liam hnuah album chu an tlangzarh ta a ni.
'Comedians on Drugs' hi english album niin single-a tihchhuah hla pali an nei tawh a, '23:00', 'Sunday', 'Waltz of The Foolish Youth' leh 'If You're Not Sweating To This Then Honey You're Not 90's'te chu an tichhuak tawh a, kan la ngaihthlak ngai loh hla thar dang paruk an chhawp chhuak tel bawk.
Avora Records hi tun dinhmunah chuan Mizorama band ṭha ber zinga mi an ni a, an achievement thlirin Mizoram mai ni lo, India ram ang pawha band ṭha ber zinga mi nia chhal ngam niin an album thar pawh hian belhchian a dawl hle.
An music 'genre' erawh mi nawlpui ngainat chi a ni chiah lo mai thei a, rimawi tuichilh lam ho erawh chuan an fak hle dawn thung tih a chiang. India ram festival lian hrang hranga lo inlan tawh Avora Records hian an album thar hi an YouTube channel-ah an dah chhuak vek tawh a, streaming platform hrang hrangah ngaihthlak theihin an dah chhuak tawh bawk.
Avora Records hi Hornbill International Rock Contest bakah hian Sennheiser Top 50 Season 3 national competition winner an ni a, MZU Vibrio Rock Fest 2017 ni tawh bawkin Rolling Stone Magazine-ah pawh an lo lang fo tawh a, RedBull Official website-a 10 Artist To Watch-ah pawh kum 2018 khan an hming a lo lang vang tawh a ni.
'Comedians on Drugs' track listing
1. Incidents
2. If You're Not Sweating To This Then Honey You're Not 90's
3. Artifical Sweeteners
4. Imperfections
5. 23:00
6. After The After Party
7. Sunday
8. Borders
9. Millenials
10. Waltsz of The Foolish Youth