Box Office-ah Barbenheimer thawm a la ring

Box Office-ah a kar hnihna atan 'Barbie' leh 'Oppenheimer' te thawm a la ring zel a, an dinhmun rawn chuhpui phak an la awm lo.

July 21-a tlangzarh, Barbie leh Oppenheimer hian WGA leh SAG-AFTRA-te nawrh huaihawt mek avanga film industry lam boruak reh tur chu a rawn hliah khuh hneh hle.

Greta Gerwig-i film, 'Barbie' hian a kar hnihna atan North American box office-ah hma hruai lehin, USD mtd 93 a lak luh belh leh. Ticket sales hi 43% vel chauhin a la tla hniam a, film industry chanchinah a kar hnihnaa ticket hralh ṭha pasarihna a la ni phak.

Christopher Nolan biographical thriller, Oppenheimer pawhin runner-up position a la luah chhunzawm zel a, USD mtd 45.2 a lak luh belh leh. Universal-in a tarlan danin, Oppenheimer hi R-rated film zingah ni sarih chhung USD mtd 10 chuang la lut thei hmasa ber a ni.

Barbenheimer thawm ring tak karah newcomer 'Haunted Mansion' chu pathumnaah awmin, USD mtd 24.2 a la lut a, tlangzarh kara a lak luh tura beisei, USD mtd 25-30 erawh a pha lo deuh. Supernatural horror comedy film-ah hian star lar rual - LaKeith Stanfield, Tiffany Haddish, Owen Wilson, Danny DeVito, Rosario Dawson, Dan Levy, Jamie Lee Curtis, leh Jared Leto-te an chang.

'Sound of Freedom' pawh palinaah la awmin, USD 12.4 a la lut leh a, Top 5 chu Tom Cruise channa, "Mission: Impossible - Dead Reckoning Part One" chuan a rawn khar a, USD mtd 10.7 a lak luh belh ve bawk.