Harry Styles-a'n charity tan USD mtd 6.5 pe

One Direction star hlui, Harry Styles chuan 'Love On Tour' a neihna aṭangin midangte ṭanpuina tur, charity tan USD mtd 6.5 a pe.

"Watermelon Sugar" hitmaker hian kar liam ta Thawhlehni, July 22 khan Italy-a RCF Arena-ah kum thum dawn tour a neihna final-na leh a show vawi 173-na a hmang a ni. Data tihchhuah thara a lan danin, North leh South America, Australia, UK leh Europe-a tour a neihna hrang hrangah hian fan mtd 5.04 vel an pung khawm a, tour neih tawh zinga sum la lut tam palina a ni mek.

Kum 29 mi, English singer-songwriter Harry Styles-a'n concert tour a neih ṭum hnihna niin, kum 2021 September 4 khan a nei ṭan a, kumin July 22-ah a khar ta a ni. Italy-a final show a neihah, a tour chu a hun tawn tawha ropui ber a ni tih sawiin, a dam chhunga a hriatreng tawh tur thil tam tak a tawng tih a sawi.