Hollywood writer leh studio-te inbe leh dawn

Nawrh huaihawt mek, Writers Guild of America (WGA) leh Alliance of Motion Picture and Television Producers (AMPTP)-te chuan inremna kawng zawnga inbiakna neih leh an remti a, vawiin hian an inbia ang.

WGA-te'n hlawh sang zawk pek phuta nawrh an huaihawt aṭanga thla thum hnua official-a inbiakna an neih lehna hmasa ber tur a ni. WGA-te hian May thla aṭang khan nawrh hi an huaihawt tawh a, July 14-ah Hollywood actor, Screen Actors Guild – American Federation of Television and Radio Artists(SAG-AFTRA)-te'n hlawh ṭha zawk leh artificial intelligence (AI) hman chungchangah khuahkhirhna siam phuta an nawrh ve leh avangin film siam leh tihchhuahte a nghawng na hle. Show tam tak cancel a ni a, film siam lai eng emaw zat chawlh san a ni bawk.

AMPTP chuan WGA-te hi inbiakna neihpui leh turin an sawm tih WGC negotiating committee chuan a tarlang a, AMPTP thupuangtu pawhin boruak ṭha tak an neih chhoh theih ngei a beisei thu a sawi.

WGA leh SAG-AFTRA nawrh huaihawt avang hian an member tam takin sum lak luh kawngah harsatna an tawk a, Hollywood superstar eng emaw zat chu harsatna tawk mekte chhawmdawlna tur hian an che chhuak. SAG-AFTRA Foundation chuan member-te pui tura ngenna a siam hnuah, kar thum chhungin donation, USD mtd 15 chuang a hmu tawh a ni. Foundation hnena sum thawh hnem zual zingah hian George Clooney, Matt Damon, Leonardo Dicaprio, Hugh Jackman, Dwayne Johnson, Nicole Kidman, Ryan Reynold leh Blake Lively, Julia Roberts, Arnold Schwarzenegger, Meryl Streep leh Oprah Winfrey-te an tel.